Charla diasabra dia 29 di agustus

Koningin Wilhelmina Fonds ta presenta un charla diasabra dia 29 di agustus

Den cuadro di nos campaña di concientisacion ‘Ban Preveni Cancer Hunto’, Koningin Wilhelmina Fonds Aruba (KWF Aruba) ta organisando un charla diasabra awor 29 di augustus na Alhambra Ballroom for di 9am te cu 11am. E campaña di concientisacion ‘Ban preveni Cancer Hunto’ ta enfoca riba 3 aspecto cu por yuda preveni cancer: Mantene un peso saludabel, Move mas y Come Saludabel y tur e tres puntonan aki lo bin dilanti den e charla.

Durante e mainta aki lo tin diferente orador.

  • Dietista Angelique Salsbach lo papia riba con come saludabel y mantene un peso saludabel por reduci e posibilidad pa haya cancer.
  • Romulo Fingal kende no ta un desconoci den comunidad y a scirbi un buki riba su bida cu cancer, lo conta e mainta aki con cancer a cambia su bida y con e ta biba mas saludabel awor.
  • Carla Sno, kende ta traha na Italia y ta psychoterapista specialisa den psycho-oncologie, lo bin na palabra tambe e mainta aki. Carla Sno ta specialisa den pashentnan cu cancer y ta guianan den e fase terminal tambe.
  • Niurca de Cuba, kende ta un fitness instructor y ta duna les di Zumba, lo papia di e beneficionan di movecion regular. Movecion ta un di e puntonan cu ta yuda un persona biba miho y ta yuda alabes pa un hende mantene un peso saludabel. 
  • Tambe KWF Aruba lo duna un splicacion riba e servicionan cu nos ta brinda comunidad.

Un peso saludabel, movecion y come saludabel no solamente ta importante den e parti preventivo pero tambe estudionan cientifico ta mustra cu un estilo di bida saludabel ta hopi importante pa e sobreviviente di cancer tambe. Come saludabel, ehercicio regular y un peso saludabel ta yuda e sobreviviente di cancer preveni pa haya cancer atrobe.

E charla aki ta dirigi riba comunidad en general y e entrada ta gratis. Si bo kier mas informacion y kier registra di antemano, bo por haci esaki na nos Centro di Informacion na Spinozastraat 9, net patras di Watertoren na Playa. Tambe por yama na 5820412 of registra via nos FaceBook Koningin Wilhelmina Fonds Aruba.